પીવાનું પાણી એ જીવનની પ્રાથમિક જરૂરીયાત છે. જીવનની લગભગ દરેક પ્રવૃતિઓ સાથે પાણી સંકળાયેલું છે તેથી પાણીની ઉપલબ્ધી એ સવિશેષ ધ્યાન ખેંચે છે. પીવા માટે સ્વચ્છ, પીવાલાયક અને પૂરતું પાણી જરૂરી છે. રાજય સરકાર આ બાબતે સંનિષ્ઠ પ્રયત્નો કરે છે અને રાજયના દરેકે દરેક ગામને પીવાનું પાણી ઉપલબ્ધ કરવાનું લક્ષ્યાંક સિધ્ધ કરશે. સરકાર પાણીની યોજનાઓ ફકત તૈયાર કરવા પૂરતું જ ધ્યાન આપવા નથી માંગતી, પરંતુ જે યોજનાઓ તૈયાર થઇ ગઇ છે તે નિયમિત રીતે ચાલે અને લોકોને નિયત થયેલ ધોરણોનું શુધ્ધ અને ગુણવત્તાવાળું પાણી મળે રહે તે અંગે પણ સજાગ છે. ગુજરાત પાણી પુરવઠા અને ગટર વ્યવસ્થા બોર્ડ એ આ સેવાને સમર્પિત બોર્ડ છે.

આમ તો પાણીએ જીવનનું અમૃત કહેવાય છે, પરંતુ જો તેની પૂરતી સાચવણી ન થાય તો તે રોગનું ઘર પણ બની શકે છે. પાણી પ્રદુષિત થવાનાં ઘણાં કારણો હોઇ શકે અને તે માટે લોકો જાણે અજાણે જવાબદાર હોય છે. ઉપરાંત દુષ્કાળના વર્ષોમાં પાણીની કારમી અછત વરતાય છે. આથી તેનો કરકસરયુકત ઉપયોગ અને સમજણ કેળવાય તથા તેનું મુલ્ય સમજાય તેવા પ્રયત્નો કરવા ખાસ જરૂરી છે.